《識用Cushion，一定揀咁用》
飛機上面資源緊拙，而Cushion/pillow一向係飛機上面的珍品。經濟艙入面，長途機乘客一般可獲一個，extra的cushion成個艙一般不會多於十個。至於短途機，即使全艙客滿cushion總數亦可能不多於五十個，即係話每四至五名乘客當中，只有一個可獲發cushion。因此每次有人問我要cushion，我都會答佢「我幫你搵下」。以免口輕輕應承左但係交唔出貨。
有一次有個香港女人同我講：「俾四個cushion我。」我呆左一秒，心諗「乜你有四個頭咁多咩？」當然，基於我的專業精神，我面露歡顏向佢表示我會幫佢睇下仲有冇咁多cushion。費一番功夫幫佢集資到四個cushion後，好奇佢要咁多cushion做乜。行埋佢個位到一睇，哦！原來佢當囝囝係劉華，用四個cushion幫佢設計同生產左張天王椅。估唔到四四方方一個cushion除左墊下頭墊下腰仲有好多玩法。不得不讚嘆造物主賦予人類創意同創造力。之不過如果個個都咁有創意的話，我地load多一百幾十個cushion上機都未必夠用。
關於用cushion墊腳呢回事，我個人都幾反對。因為好多時客人訓著左之後都傳奇球星上身，踢晒Cushion出條走道上面，易生意外。萬一你唔記得自己踐踏過個cushion，等陣又用來「敷面」，其實都幾唔衛生。
Search